SBI-hikes-R.D-rates-F.D-rates-details
SBI మరో గుడ్‌న్యూస్.. ఆ డిపాజిట్లపై వడ్డీ రేట్ల పెంపు.. మీ డబ్బులకు చక్రవడ్డీ వర్తింపు!
SBI: భారత్‌లోనే అతిపెద్ద ప్రభుత్వం రంగ బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) తమ కస్టమర్లకు మరోసారి గుడ్ న్యూస్ అందించింది. ఇప్పటికే వివిధ రకాల ఫిక్స్‌డ్ డిపాజిట్లు (ఎఫ్‌డీ)లపై వడ్డీ రేట్లను భారీగా పెంచిన సంగతి విదితమే. ఇప్పుడు తమ బ్యాంకులో డిపాజిట్లు చేసే వినియోగదారులకు అద్భుతమైన శుభావర్త చెప్పింది. రికరింగ్ డిపాజిట్లు (recurring deposits) లపై వడ్డీ రేట్లను పెంచుతున్నట్లు ప్రకటించింది. కొత్త వడ్డీ రేట్లు ఫిబ్రవరి 15, 2023 నుంచే అమలులోకి రానున్నాయి. ఈ క్రమంలో రికరింగ్ డిపాజిట్లపై ఎంత మేర వడ్డీ రేట్లు పెంచింది అనే పూర్తి వివరాలను తెలుసుకుందాం.
నిర్ణయించిన కాలపరిమితి వరకు క్రమ పద్ధతిలో కస్టమర్లకు అనువైన మొత్తం పొదుపు చేసుకోగలిగే నగదు డిపాజిట్ చేసే అవకాశాన్ని ఈ రికరింగ్ డిపాజిట్లు కల్పిస్తాయి. నెల నెలా డిపాజిట్ చేసేందుకు ఆర్‌డీలు మంచి అవకాశం. చక్రవడ్డీ సూత్రం ఆర్‌డీలకు వర్తిస్తుంది. ప్రతి మూడు నెలలకు ఓసారి చక్రవడ్డీ జమ చేస్తారు. స్టేట్ బ్యాంక్ ఆఫ్ ఇండియాలో రికరింగ్ డిపాజిట్ ఖాతాను తెరిచి కనిష్ఠంగా రూ.100 నుంచి డిపాజిట్ చేయవచ్చు. ఈ ఆర్‌డీ ఖాతాను 12 నెలల నుంచి 10 ఏళ్ల కాలానికి తీసుకోవచ్చు. ఫిక్స్‌డ్ డిపాజిట్లు (Fixed Deposit) మాదిరిగానే ఇందులోనూ సీనియర్ సిటిజన్లకు అదనంగా వడ్డీ రేట్లు వివిధ టెన్యూర్‌లపై ఉంటాయి.
SBI Recurring Deposit (RD)
ఎస్‌బీఐ రికరింగ్ డిపాజిట్ వడ్డీ రేట్లు సాధారణ కస్టమర్లకు 6.5 శాతం నుంచి 7 శాతంగా ఉన్నాయి. సీనియర్ సిటిజన్లకు అదనంగా 50 బేసిస్ పాయింట్లు వడ్డీ రేటు వస్తుంది. వివిధ టెన్యూర్లకు ఆర్‌డీ వడ్డీ రేట్లు ఈ విధంగా ఉన్నాయి.
ఎస్‌బీఐలో ఏడాది నుంచి రెండేళ్లలోపు చేసే రికరింగ్ డిపాజిట్లపై వడ్డీ రేట్లు 6.80 శాతానికి పెంచింది బ్యాంక్
రెండేళ్ల నుంచి మూడేళ్ల లోపు డిపాజిట్లపై 7 శాతం వడ్డీ
మూడేళ్ల నుంచి 5 ఏళ్ల లోపు డిపాజిట్లపై 6.5 శాతం వడ్డీ
ఐదేళ్ల నుంచి 10 ఏళ్లలోపు డిపాజిట్లపై 6.5 శాతం వడ్డీ వస్తుంది.
SBI hikes FD rates
రిజర్వ్ బ్యాంక్ ఆఫ్ ఇండియా రెపో రేటు పెంచిన క్రమంలో రుణాలపై వడ్డీ రేట్లను పెంచుతూనే వివిధ రకాల డిపాజిట్లపై వడ్డీ రేట్లను పెంచి కస్టమర్లను ఆకర్షించే ప్రయత్నాలు చేపట్టింది స్టేట్ బ్యాంక్ ఆఫ్ ఇండియా. రూ.2 కోట్లు లోపు చేసే ఫిక్స్‌డ్ డిపాజిట్లపై ఇప్పటికే వడ్డీ రేట్లను భారీగా పెంచింది. ఏడాది నుంచి రెండేళ్లలోపు ఎఫ్‌డీలపై 6.75 శాతం నుంటి 6.80 శాతానికి వడ్డీ రేటును పెంచింది. రెండేళ్ల నుంచి 3 ఏళ్ల లోపు డిపాజిట్లకు 7 శాతం, మూడేళ్ల నుంచి 5 ఏళ్ల డిపాజిట్లకు 6.50 శాతానికి వడ్డీ రేట్లు పెంచింది. సీనియర్ సిజిటన్లకు ఏడు రోజుల నుంచి 10 ఏళ్ల మధ్య చేసే డిపాజిట్లకు కనిష్ఠంగా 3.5 శాతం నుంచి గరిష్ఠంగా 7.5 శాతంగా వడ్డీ రేటు అందిస్తోంది.
మరోవైపు.. 400 రోజుల కోసం ప్రత్యేక ఫిక్స్‌డ్ డిపాజిట్ పథకాన్ని ప్రవేశపెట్టింది ఎస్‌బీఐ. ఈ కొత్త స్కీమ్ మార్చి 31, 2023 వరకు మాత్రమే అందుబాటులో ఉండనుంది. ఇందులో చేసే డిపాజిట్లకు గరిష్టంగా 7.10 శాతం వడ్డీ ఇస్తోంది.