sbi-imps-charges-changes-to-February-1st-2022
SBI గుడ్‌న్యూస్… వచ్చే నెల నుంచి ఈ ఛార్జీలు చెల్లించనక్కర్లేదు
స్టేట్ బ్యాంకు ఆఫ్ ఇండియా(ఎస్‌బీఐ) కస్టమర్లకు గుడ్ న్యూస్. నెట్ బ్యాంకింగ్, మొబైల్ బ్యాంకింగ్ ద్వారా రూ.5 లక్షల వరకు చేసుకునే ఇమ్మిడియేట్ పేమెంట్ సర్వీసు(ఐఎంపీఎస్) లావాదేవీలపై కస్టమర్లు ఎలాంటి ఛార్జీలు చెల్లించాల్సివనసరం లేదని ఎస్‌బీఐ తెలిపింది. వచ్చే నెల 1 నుంచే ఈ కొత్త ఐఎంపీఎస్ ఛార్జీలు అమల్లోకి రాబోతున్నాయి.
ఎస్‌బీఐ కస్టమర్లు బ్యాంకు నెట్ బ్యాంకింగ్, మొబైల్ బ్యాంకింగ్, యోనో ద్వారా ఐఎంపీఎస్ ఫీచర్‌ను వాడుకుంటూ రూ.5 లక్షల వరకు లావాదేవీలను ఉచితంగా చేసుకోవచ్చని పేర్కొంది. అంతకుమందు ఎస్‌బీఐ బ్యాంకు కేవలం రూ.2 లక్షల వరకు విలువైన ఐఎంపీఎస్ లావాదేవీలను మాత్రమే కస్టమర్లకు అనుమతి ఇచ్చేది. ఎస్‌బీఐ ప్రస్తుతం ఈ పరిమితిని రూ.5 లక్షలకు పెంచింది.
‘కస్టమర్లు డిజిటల్ బ్యాంకింగ్‌ను చేపట్టేలా ప్రోత్సహించేందుకు, రూ.5 లక్షల వరకు చేసుకునే ఐఎంపీఎస్ లావాదేవీలపై ఎలాంటి ఛార్జీలు విధించకూడదని నిర్ణయించాం. ఇంటర్నెట్ బ్యాంకింగ్, మొబైల్ బ్యాంకింగ్, యోనో ద్వారా ఉచితంగా ఈ లావాదేవీలు చేసుకోవచ్చు. అయితే బ్రాంచ్ ఛానళ్లలో మాత్రం ఐఎంపీఎస్ సర్వీసు ఛార్జీలు మారవు. ప్రస్తుత శ్లాబుల్లోనే బ్రాంచులలో లావాదేవీలు చేసుకోవచ్చు.’ అని ఎస్‌బీఐ తన ప్రకటనలో తెలిపింది.
అయితే బ్యాంకు బ్రాంచులలో రూ.2 లక్షల నుంచి రూ.5 లక్షల వరకు చేసే లావాదేవీలకు కొత్త శ్లాబును ప్రవేశపెట్టింది. ఈ శ్లాబు కింద వచ్చే నెల 1 నుంచి రూ.20 ప్లస్ జీఎస్టీని విధించనుంది. నెఫ్ట్, ఆర్‌టీజీఎస్ సర్వీసు ఛార్జీలకు అనుగుణంగా ఐఎంపీఎస్ సర్వీసు ఛార్జీలను ఉంచాలని చూస్తున్నట్టు బ్యాంకు చెప్పింది.
బ్యాంకు బ్రాంచులలో ఐఎంపీఎస్ ఛార్జీలు..
-
రూ.1000 లేదా అంతకంటే తక్కువ ఐఎంపీఎస్ లావాదేవీలకు ఎలాంటి ఫీజు లేదు
-
రూ.1,000 నుంచి రూ.10 వేల వరకు చేసే లావాదేవీలకు రూ.2 సర్వీసు ఛార్జీ ప్లస్ జీఎస్టీ విధిస్తుంది.
-
రూ.10 వేల నుంచి రూ. లక్ష వరకు చేసే ఐఎంపీఎస్ లావాదేవీలకు రూ.4 సర్వీసు ఛార్జీ ప్లస్ జీఎస్టీ విధిస్తోంది.
-
లక్షకు పైన, రూ.2 లక్షల వరకు చేసే ఐఎంపీఎస్ లావాదేవీలకు రూ.12 సర్వీసు ఛార్జీ ప్లస్ జీఎస్టీ చెల్లించాలి.
-
కొత్తగా రూ.2 లక్షల నుంచి రూ.5 లక్షల వరకు చేసే ఐఎంపీఎస్ లావాదేవీలకు రూ.20 సర్వీసు ఛార్జీ ప్లస్ జీఎస్టీ విధించనున్నారు.